ლარმა გაუფასურება 2013 წლის ბოლოდან დაიწყო, როდესაც ლარის კურსი დოლარის მიმართ 1.66 იყო. გაუფასურების პირველი ტალღის შემდეგ ლარის კურსი 1.75-ზე გაჩერდა. გაუფასურების მეორე და უფრო მნიშვნელოვანი ტალღა 2015 წლის ნოემბრიდან დაიწყო და კურსის რეკორდული მაჩვენებელი, 2.50, მიმდინარე წლის თებერვალში დაფიქსირდა. გაზაფხულზე ლარი 2.13-მდე გამყარდა, თუმცა შემდეგ ისევ გაუფასურების ტენდენციას დაუბრუნდა, რომელიც დღემდე გრძელდება.

ბოლო 3 წლის განმავლობაში, საქართველოს მთავრობის წევრებმა მრავალჯერ გააკეთეს განცხადება, რომ ლარის გაუფასურება დროებითი იყო და ლარის კურსი დასტაბილურდებოდა ან გამყარდებოდა. გაუფასურების მიზეზად კი, სხვადასხვა ფაქტორს ასახელებდნენ.

• ნოდარ ხადური - ლარის კურსის გაუფასურება დროებითი პროცესი იყო.

• ნოდარ ხადური - მე თავიდანვე ვამბობდი, რომ ხელოვნური აჟიოტაჟის გამოწვევა არ იყო საჭირო და ეს იყო დროებითი მოვლენა.

• გიორგი კვირიკაშვილი - ლარის კურსთან დაკავშირებით არაფერი საპანიკო არ არის.

• ნოდარ ხადური - მე იმედი მაქვს, რომ პიკზეა ასული გაცვლითი კურსი და მომავალი კვირის განმავლობაში დასტაბილურდება და შესაძლებელია ქვემოთ დაიწიოს.

• ნოდარ ხადური - ლარის კურსი კიდევ უფრო ქვემოთ არის ჩამოსული, აჟიოტაჟი ჩაცხრა. რასაც ჩვენ ვამბობდით, კურსი ნელ-ნელა დასტაბილურდა და ქვემოთ მოიწევს.

• ირაკლი ღარიბაშვილი - ლარის კურსზე სიტუაცია კონტროლს ექვემდებარება.

• ნოდარ ხადური - ლარი ინარჩუნებს პოზიციებს.

• ბიძინა ივანიშვილი - ლართან დაკავშირებით ვიტყვი, რომ მოგონილი თემაა ეს და არანაირ ტვირთად არ აწევს ეს საზოგადოებას, გარდა სააგიტაციო მანქანისა, რასაც "რუსთავი 2" ახერხებს. ეს ფასებზე არ ასახულა, არაფერი განსაკუთრებული არ ხდება გარდა კარგისა. ლარი აჩვენებს სწორედ, რომ ცოცხალი და ჯანმრთელი ორგანიზმია.

• გიორგი კვირიკაშვილი - ქამრების შემოჭერა, ეს არის ის პირველი ადეკვატური ნაბიჯი, როდესაც ხედავ, რომ შენი მოსახლეობა საკმაოდ დაზარალდა ამ საკურსო ცვლილების გამო. ამას ორმაგი დატვირთვა აქვს. პირველ რიგში, ეს არის მორალური ნაბიჯი, ხოლო მეორე მხრივ, ეს არის ეკონომიკის კუთხით გადადგმული ნაბიჯი, რომ ჩვენ მეტი ჟანგბადი დავუტოვოთ ბიზნესს. ჩვენ გვაქვს ძალიან კონკრეტულ ნაბიჯებზე გათვლილი გეგმა, რაც ნამდვილად მოიტანს ხელშესახებ შედეგს. არ უნდა ვიყოთ პესიმისტურად განწყობილნი, არ გვაქვს ამისი არანაირი საფუძველი.

• ირაკლი ღარიბაშვილი - მთელი მთავრობა მობილიზებულია. გვაქვს მჭიდრო ურთიერთობა ეროვნულ ბანკთან. მიმაჩნია, რომ მართლაც ხელოვნურად იყო შექმნილი ისტერიკა და შოუების საკეთებელ თემად გადაიქცა.

• ნოდარ ჯავახიშვილი - საერთაშორისო სავალუტო ფონდის მისიის ხელმძღვანელი "ნაციონალების" მოსყიდულია. ბიძინას განცხადების შემდეგ პანიკა ჩაცხრა, ხალხი დამშვიდდა და კურსმა გამყარება დაიწყო. ბიძინამ ის თქვა, რაც რეალობაა. ლარის კურსის გაუფასურება ნოემბრიდან დაიწყო. იცი რა გააკეთა ქადაგიძემ მაგ დროს? მიმოქცევაში ისედაც ჭარბი რაოდენობის ლარი იყო, ადგა და კომერციული ბანკების დაკრედიტება 350 მილიონიდან 700 მილიონ დოლარამდე გაზარდა.

• ნოდარ ხადური - შიდა შოკები მადლობა ღმერთს არა გვაქვს, მაგრამ გვაქვს პატარა შოკუნიები. და ეს პატარა, ასე ვთქვათ შოკუნიები, არის სურვილი ჩვენი ოპონენტების - ნახონ ცეცხლში გახვეული საქართველო. სრული პასუხისმგებლობით ვამბობ ამას.

• ნოდარ ხადური - ჩვენ ვმუშაობთ, კომუნიკაცია გვაქვს ეროვნულ ბანკთანაც და მე იმედი მაქვს, რომ ეს დროებითი მოვლენა იყო და კურსი დასტაბილურდება.

• გიორგი კვირიკაშვილი - არის პატარა ცვლილებები, მაგრამ ყველა ფუნდამენტური საფუძველი არსებობს იმისთვის, ვიფიქროთ, რომ ყველა ლოგიკით ეროვნული ვალუტის გამყარება უნდა დაიწყოს.

• გიორგი კვირიკაშვილი - აუცილებლად მოხდება დასტაბილურება, თუმცა კიდევ ერთხელ ვამბობ, ეს არ გამორიცხავს რყევებს ორივე მიმართულებით, რასაც დღეს ადგილი აქვს. თუმცა, კიდევ ერთხელ ვამბობ, ჩვენ დარწმუნებული ვართ, რომ საშუალოვადიან პერსპექტივაში, ეს იქნება აუცილებლად პოზიტიური ტენდენცია და ეს უკვე გამოიხატება ზაფხულის პერიოდში.

• ნოდარ ხადური - ჯერ კიდევ მაშინ, როდესაც დღეში 5-6 თეთრით გაუფასურდა ლარი, მაშინაც ვთქვი, რომ ეკონომიკური ფაქტორები ამოწურული იყო და ეს ალბათ იყო უფრო აჟიოტაჟური სიტუაცია. ეს დადასტურდა.

• ირაკლი ღარიბაშვილი - სპეკულაციები მიმდინარეობს, კრიზისული პერიოდი გადავიარეთ.

• ირაკლი ღარიბაშვილი - სახეზე გვაქვს აბსოლუტურად გამოკვეთილი სპეკულაცია და აჟიოტაჟი. ეს არის ემოციურ-ფსიქოლოგიური ფაქტორი. მთავარია, სიმშვიდე შევინარჩუნოთ. ჩვენს ეკონომიკაში, მაკროეკონომიკაში არაფერი განსაკუთრებული არ ხდება, პირიქით, ეს ეტაპი გადავლახეთ.

• ნოდარ ხადური - ადგილი აქვს გარკვეულ სპეკულაციურ მოვლენებს ბაზარზე და კურსი აუცილებლად დასტაბილურდება. ამაში ღრმად ვარ დარწმუნებული.

• ირაკლი ღარიბაშვილი - როგორც ეროვნული ბანკის პრეზიდენტის, ასევე ფინანსთა მინისტრის პროგნოზებით, ლარის დასტაბილურება უნდა დაიწყოს საშუალოვადიან პერსპექტივაში.

• გიორგი კვირიკაშვილი - აქ არაფერი საგანგაშო ნამდვილად არ არის, ჩვენ ნამდვილად გვაქვს ყველა მიზეზი იმისთვის, რომ ოპტიმისტურად ვიყოთ განწყობილი. საქართველოში წელს იქნება საკმაოდ კარგი ეკონომიკური ზრდა და ჩვენ ვერანაირ საფუძველს ვერ ვხედავთ იმისას, რომ ნეგატიურს ვხედავდეთ საშუალო და გრძელვადიან პერსპექტივაში.

• ნოდარ ხადური - ლარზე დამატებით დაწოლას არ მოველით. საკმაოდ ოპტიმისტურად ვართ განწყობილები. მინდა გითხრათ, რომ შიდამაკროეკონომიკური პარამეტრები არ არის შეცვლილი და გაუარესებული, ისევე როგორც ბიუჯეტი და სახაზინო ოპერაციები არ ახდენს დაწოლას გაცვლით კურსზე.

• ნოდარ ხადური - მე მინდა, გითხრათ, რომ კურსის მკვეთრ ცვლილებას დევალვაციის კუთხით არ ველოდებით. ჩვენს მეზობელ ქვეყნებში სტაბილურობა შეიმჩნევა. უკვე იმედი გვაქვს, რომ კურსი დასტაბილურდება და საშუალოვადიან პერიოდში საკმაოდ სერიოზულ გამყარებას ველოდებით.

• დიმიტრი ქუმსიშვილი - დარწმუნებით შემიძლია გითხრათ, რომ მაკროეკონომიკური ფუნდამენტითაც და ზოგადად, ეკონომიკაში მუდმივად რაც მეორდება, იმის მიხედვით, ლარი ნამდვილად გამყარდება.

• დიმიტრი ქუმსიშვილი - მე ვარ დარწმუნებული, რომ ჩვენი ვალუტის კურსი იქნება სტაბილური, მათ შორის არჩევნების შემდეგაც. ჩვენ გვაქვს მცურავი გაცვლითი კურსი, თუმცა ის იქნება სტაბილური.

• ნოდარ ხადური - საშუალოვადიან პერსპექტივაში ჩვენ ნამდვილად ველოდებით გაცვლითი კურსის დასტაბილურებასა და გამყარებას. ეს არის მოკლევადიანი რყევები, მომავალი წელი გაცილებით უკეთესი იქნება.

• ნოდარ ხადური - გაცვლითი კურსის ცვლილება გამოწვეული იყო ერთჯერადი ტრანზაქციებით. არაერთი განცხადება გაკეთდა, როგორც ჩვენი მხრიდან, ასევე ეროვნული ბანკისა და საერთაშორისო საფინანსო ინსტიტუტების მხრიდან, რომ კურსი დასტაბილურდება და საშუალოვადიან პერიოდში შეინარჩუნებს გამყარების ტენდენციას.