ხუთმა მათგანმა პროტესტის უკიდურეს ფორმას მიმართა და პირი ამოიკერა. დევნილები მათთვის მინიჭებულ ქულებს აპროტესტებენ და საცხოვრებელი ფართებით უზრუნველყოფას ითხოვენ.
54დევნილი ოჯახი წლებია აღნიშნულ ტერიტორიაზე ცხოვრობს, შენობა საცხოვრებლად უვარგისია, კედლები და ჭერი მთლიანად დაზიანებულია, იატაკი ჩანგრეული. დაახლოებით ერთი თვის წინ, იმ ადგილას, სადაც ბავშვები თამაშობდნენ, ჭერი ჩამოინგრა და ხუთი წლის ნ. კ. -ს ფიზიკური დაზიანება გამოიწვია. ბავშვს სახეზე ჭრილობის კვალი დღემდე ეტყობა. დედამისი ერთ-ერთი მათგანია, რომელმაც გაუსაძლისი პირობებისა და დაბალი ქულის მინიჭების გამო პირი ამოიკერა.
„ყველანი კარგად ხედავთ, თუ რა შენობაში ვცხოვრობთ, ღამე ნახევრად არ მძინავს და სულ ბავშვებისკენ ვიყურები, რომ თავზე ჭერი არ დაეცეთ. აქ ყველა სოციალურად დაუცველი ოჯახი ცხოვრობს. ოთხი ოჯახის გარდა, ყველა დანარჩენმა არაობიექტური ქულები მივიღეთ. ვითხოვთ კომისიას, რომელიც ხელახლა გადაამოწმებს ჩვენს საცხოვრებელ პირობებს“, - ამბობს დევნილი ნონა შონია.
დევნილებთან ამ დრომდე არც ადგილობრივი ხელისუფლებისა და არც აფხაზეთის მთავრობის წარმომადგენლები მისულან. მოშიმშილეები პრემიერ-მინისტრს მიმართავენ და დევნილთა და განსახლების მინისტრის გადადგომას მოითხოვენ.
მთელი ღამე კარავში დევნილებთან ერთად ზუგდიდის საკრებულოს წევრი, ენმ-ის წარმომადგენელი ანი წითლიძე იმყოფებოდა. „მე ქალაქის ხელმძღვანელ პირებს, ასევე გუბერნატორს ვთხოვე, რომ მოსულიყვნენ აქ ადგილზე და ელემენტარულად ენახათ მაინც დევნილების უკიდერესად რთული მდგომარეობა, მაგრამ, ჯერჯერობით, არავინ გამოჩენილა. დევნილების ჯანმრთელობაზე პასუხისმგებლობა მთლიანად ადგილობრივ და ცენტრალურ ხელისუფლებას ეკისრება“, - ამბობს წითლიძე.
მისივე თქმით, ზუგდიდიდან პარლამენტს ხუთი წარმომადგენელი ჰყავს, მათი პირდაპირი ვალდებულებაა, რომ აქ იყვნენ დევნილებთან ერთად მანამ, სანამ მოშიმშილე დევნილებს ცენტრალური ხელისუფლება ყურადღებას არ მიაქცევს, „მე მოვუწოდებ ხუთივე პარლამენტის წევრს, რომ კეთილი ინებონ, თავიანთი თბილი სავარძლებიდან ადგნენ და ამ ხალხს პრობლემები მოუგვარონ“.
დევნილთა სამმართველოს ხელმძღვანელი მანუჩარ ჩილაჩავა მხოლოდ მცირე კომენტარით შემოიფარგლა და ფაქტ-მეტრთან საუბარში განაცხადა, რომ დევნილების მოთხოვნა ამ ეტაპზე ვერ დაკმაყოფილდება. მისივე თქმით, მათ საცხოვრებელ პირობებს კომისია ხელახლა ვერ გადაამოწმებს.
„როგორც კი გავიგეთ, რომ რომ მანუჩარ ჩილაჩავას სიმამრს, რომელიც ახლა ენგურს გაღმა ცხოვრობს, 13 ქულა მიანიჭეს, იმ დღესვე მივედით აფხაზეთის სამმართველოში და ვნახეთ ბატონი ჩილაჩავა, მე პირადად ვკითხე თუ სად არის სამართალი მეთქი, ჩაიცინა და იქვე უპასუხოდ დაგვტოვა. ამის შემდეგ, გადავწყვიტეთ, რომ შიმშილობა დაგვეწყო, ჩაწყობებს აქვს ადგილი და სულ თავიანთ ხალხს ეხმარებიან. არ ავდგებით აქედან მანამ, სანამ ჩვენს მოთხოვნებს არ დააკმაყოფილებენ, მეტი გზა არ დაგვიტოვეს“, - ამბობს მოშიმშილე დევნილი ნაზი გამისონია.
დევნილებმა დახმარების თხოვნით წერილი საქართველოს სახალხო დამცველს უჩა ნანუაშვილსაც გაუგზავნეს. მანამდე მსგავსი ხასიათის წერილით არაერთხელ მიმართეს დევნილთა და განსახლების სამინისტროსა და ადგილობრივ ხელისუფლებას, თუმცა წერილებს რეაგირება არ მოჰყოლია.
დევნილებთან „საერთაშორისო გამჭვირვალობა - საქართველოს“ სამეგრელო-ზემო სვანეთის წარმომადგენელი არჩილ თოდუა იმყოფებოდა. როგორც მან ჩვენთან საუბარში აღნიშნა, უახლოეს დღეებში გაერკვევიან, დევნილებისთვის დაბალი ქულების მინიჭება რა კრიტერიუმებით მოხდა.
